ခုအချိန်မှာ ၂၀၁၇ ခုနှစ်ရဲ့ အမှတ်တရတွေကို ပြောပါဆိုရင်
အချိန်တွေအကြာကြီး ဝေးကွာပျောက်ဆုံးနေခဲ့တဲ့ ချင်းပြည်နယ်က အောက်ချင်းငှက်တွေကို
ပြန်တွေ့ခြင်းလို့ပဲ ပြောရမယ်ထင်ပါတယ်။
ဘာဖြစ်လို့လဲဆိုတော့ အခုရက်ပိုင်းအတွင်း
ချင်းတောင်တန်းမှာ နေခဲ့တုန်းက အရမ်းအားကိုးရပြီး အရမ်းလည်းခင်မင်ရင်းနှီးခဲ့တဲ့
ချင်းတောင်တန်းက ကျောင်းသားတွေနဲ့ ဖေ့ဘုတ်ကြီးရဲ့ ကျေးဇူးကြောင့် ပြန်တွေ့ကြတယ်။
တောင်တန်းဒေသမှာ ကျုပ်တာဝန်ကျတာက ချင်းပြည်နယ်၊
ပလက်ဝမြို့နယ်ထဲက လူအများက ရွှေတောင်လို့ ခေါ်နေကြတဲ့ မောက်ချောင်းဝကျေးရွာပါ။
ရွာအရှေ့ဘက်မှာရှိတဲ့ တောင်ကြီးတစ်တောင်က
ညနေပိုင်းဆိုရင် ရွှေရောင်တွေတောက်နေတာကို အစွဲပြုပြီး ရွာနာမည်ကိုလည်း
ရွှေတောင်လို့ ခေါ်ခဲ့ကြပါသတဲ့။
ရွာနာမည်ကသာ ရွှေတောင် ရွာမှာနေတဲ့လူတွေက ဖွတ်ထက်တောင်
မွဲနေသေးတယ်။ အဲဒီရွာမှာ ဗုဒ္ဓဘာသာကိုးကွယ်တဲ့ လူအင်အားက အရမ်းနည်းတာကြောင့်
သာသနာပြု ၂ နှစ်တာကာလမှာ ကိုယ့်ရွာမှာနေခဲ့ရတဲ့အချိန်က ၆ လတောင်
ပြည့်လိမ့်မယ်မထင်ပါဘူး။
ကိုယ်တာဝန်ကျတဲ့ရွာက အဆင်မပြေတော့ အနီးအနားက ဗုဒ္ဓဂါမ၊
သီရိဂါမ၊ မောင်ရွာ၊ သံထောင်၊ ဖားစင်ဆိုတဲ့ ရွာတွေမှာ တာဝန်ကျနေတဲ့
သူငယ်ချင်းတွေရဲ့ ကျောင်းတွေမှာ တစ်လှည့်စီ အဆင်ပြေသလို လိုက်နေရင်းနဲ့ သာသနာပြု ၂
နှစ်တာကာလ ကုန်ဆုံးသွားခဲ့တာပါပဲ။
အဲဒီတုန်းက တောင်တန်းဒေသမှာ အရမ်းရင်းနှီးနဲ့
သူငယ်ချင်းတွေနဲ့ တွေ့ခဲ့ရသလို အရမ်းအားကိုရပြီး စိတ်သဘောထား ရိုးသားကြတဲ့
ချင်းတိုင်းရင်းသား ကျောင်းသားတွေနဲ့လည်း ဆုံခဲ့ရပါတယ်။
မောင်ရွာမှာဆိုရင် ဖြူလှ၊ ဖိုးကုလားနဲ့
ကျောင်းသားကြီးတို့က ကျုပ်ရဲ့ မရှိမဖြစ်တဲ့ ရဲဘော်ကြီးတွေပေါ့။ ဘယ်သွားသွား၊
ဘယ်လာလာ၊ ဘာပဲလုပ်လုပ် ဒီကောင်ကြီးတွေ မပါလို့ မပြီးဘူး။ မရှိအတူ ရှိလည်းအတူဆိုတဲ့
ငတ်ဖော်ငတ်ဖက်ကြီးတွေဆိုရင်လည်း မှားမယ်မထင်ပါဘူး။
သီရိဂါမမှာဆိုရင် မောင်လှတို့ သိန်းမောင်တို့ဆိုတာလည်း
အရမ်းအားကိုးရတဲ့ ရဲဘော်ကြီးတွေပဲ။ ဘုန်းကြီးက လိုအပ်တာမှန်သမျှ ဒီကောင်ကြီးတွေကို
ပြောလိုက်ရင် အားလုံးမီးငြိမ်းတယ်။ သူတို့ရွာကိုရောက်လာတဲ့ ဆရာတော်တွေ
ပျင်းမှာစိုးလို့ အဆက်အသွယ်အရမ်းဝေးတဲ့ တောတောင်တွေကြားထဲက ဘောလုံးကွင်းကြီးထဲမှာ
ဗီဒီယိုပြပြီး အပျင်းပြေစေခဲ့သူတွေပါပဲ။
သံထောင်မှာဆိုရင်တော့ မြင့်ထွန်း၊ ကျော်မိုးယံနဲ့
ဇော်မြင့်ဌေးတို့က တောင်တန်းသာသနာပြု ဆရာတော်တွေရဲ့ အားအကိုးရဆုံး
ကပ္ပိယကြီးတွေပေါ့။ အိမ်မှာစားစရာမရှိရင်နေပါစေ ကျောင်းကဆရာတော်တော့ ဘယ်တော့မှ
ဆွမ်းမငတ်စေရဘူးဆိုတဲ့ စိတ်ဓာတ်ရှိတဲ့လူမျိုးတွေပါ။
ဗုဒ္ဓဂါမမှာဆိုရင် အားနိုးနဲ့ ကံလုံးတို့က
ကျုပ်ရဲ့အားကိုးရတဲ့ ဘယ်လက်ရုံး ညာလက်ရုံးကြီးတွေပါပဲ။ ဗုဒ္ဓဂါမကိုရောက်ရင်
ဒီကောင်နှစ်ယောက်ရှိမှ အဆင်ပြေတယ်။ သူတို့မရှိရင် ဆွမ်းတစ်နပ်စားဖို့အရေး
သိပ်မလွယ်ဘူး။
အဲဒီကျောင်းသားတွေနဲ့ ခရီးပေါင်းများစွာကို
အတူတူသွားခဲ့ဖူးသလို ဒီကောင်တွေနဲ့ပဲ အခက်အခဲပေါင်းများစွာကို
ဖြတ်သန်းခဲ့ဖူးပါတယ်။ ဒီကောင်တွေနဲ့ပဲ တောင်တန်းမြေမှာ တစ်ခါမှမတွေ့ခဲ့ဘူးတဲ့
ဗဟုသုတတွေကိုလည်း ရခဲ့ပါတယ်။
အဲဒီကျောင်းသားတွေနဲ့အတူ မြင့်မားလွန်းတဲ့ ချင်းပြည်နယ်က
တောင်ကုန်းတောင်တန်းများစွာကို ဖြတ်ကျော်ခဲ့ဖူးတယ်။ ရေစီးအရမ်းကြမ်းတဲ့
လေးမြို့မြစ်ကြောတစ်လျောက်ကို လှေတစ်စီးနဲ့ အကြိမ်ပေါင်းများစွာ အစုန်အဆန်
အပြန်ပြန်အလှန်လှန် သွားလာခဲ့ဖူးတယ်။
မြေပြန့်ကလူတွေအတွက် စိတ်ကူးထဲမှာပင် ထည့်မစဉ်းစားဖူးတဲ့
ချောင်းကမ်းဘေးက အမိုးအကာမရှိတဲ့ ကျောက်စရစ်ပြင်ပေါ်မှာ ကျောက်တုံးကို
ခေါင်းအုံးလုပ်ပြီး ဒီကျောင်းသားတွေနဲ့ အကြိမ်များစွာ အိပ်ခဲ့ဖူးတယ်။
အခုတော့ ကံကြမ္မာရေစက်က မကုန်သေးတော့ တို့တတွေ
ပြန်တွေ့ရပြန်လေပြီ။ ဖေ့ဘုတ်ဆိုတဲ့ ကွန်ယက်ကြီးပေါ်မှာ မင်းတို့နဲ့ ပြန်တွေ့ပြီး
လက်တွေ့ဘ၀မှာလည်း တို့တွေပြန်ဆုံချင်ပါသေးတယ်။
ဒီတစ်ခေါက် တို့တွေပြန်ဆုံကြရင် အရင်လို
ပျော်ပျော်ပါးပါးနဲ့ အစစအရာရာ ရှားပါးလွန်းတဲ့ မင်းတို့အောက်ချင်းမြေမှာ
ဘာသာ၊သာသနာ အလင်းရောင်တွေ ထွန်လင်းလာအောင် တစ်ကျော့ပြန်ပြီး ထွန်းညှိနိုင်ပါစေဟု
ဆုတောင်းလျက် . . . . .။
တစ်ချိန်တုန်းက ကိုရွှေလို့
မင်းတို့အမြတ်တနိုးခေါ်ခဲ့ကြတဲ့
အခု ကိုပေါက်ခေါင်း
No comments:
Post a Comment