အမေ့အသက် အနှစ်သုံးဆယ်

အော် တို့တတွေကို မွေးဖွားပေးခဲ့တဲ့ 
မိခင်တက္ကသိုလ်ကြီးတောင် 
အနှစ်သုံးဆယ်ပြည့်လို့ ပုလဲရတုကိုတောင် ရောက်ခဲ့ပါပေါ့လား

အမေ မွေးထုတ်ပေးလိုက်လို့ 
အရွယ်ရောက်တဲ့ သားတွေလည်း 
အများကြီး ဖြစ်နေပါပြီ

သာသနာအတွက် အားကိုးရမယ့် 
သားကောင်းအာဇာနည်တွေကို 
ဆက်လက်မွေးထုတ်ပေးဖို့ 
အမေ့မှာ အားအင်တွေ အပြည့်ရှိနေဆဲပါပဲ

အခု အမေ့အသက် အနှစ် (၃၀) ပြည့်မှာ 
အမေ့ရင်ခွင်ကို ပြန်လည်ခိုဝင်လာတဲ့ 
အမေ့သားတွေနဲ့အတူ အမေလည်း ပျော်နေရောပေါ့

အဝေးကိုရောက်နေတဲ့ အမေ့သားတွေ 
အမေ့ဆီကို ပြန်လာကြသလို 
အမေ့သားတစ်ယောက်ဖြစ်တဲ့ ကျွန်ုပ်တစ်ယောက်လည်း 
အမေ့ရင်ခွင်ကို ပြန်လာချင်တာပေါ့

ဒါပေမယ့် အမေရယ် …

ကံကြမ္မာက မျက်နှာသာ မပေးလေတော့ 
အမေ့အရိပ်မှာ ပျော်မွေ့နေတဲ့ တခြားညီအစ်ကိုတွေကို 
အဝေးကနေကြည့်ပြီး 
မျက်ရည်တွေနဲ့ သားငေးနေခဲ့မိပါတယ် အမေ

ကံကြမ္မာအခြေအနေမပေး 
အဝေးကို ရောက်နေလို့ 
အမေ့ဆီကို ပြန်မလာနိုင်တာ ခွင့်လွှတ်ပါ အမေ

အမေ့ရင်ခွင်မှာ ခိုလှုံစဉ်အခါတုန်းက 
တခါတလေ ဘ၀င်မကျတဲ့အခါ 
အမေ့ကို အပြစ်တင်ခဲ့ဖူးတယ်

ကြီးမားလှတဲ့ အမေ့ကျေးဇူးတွေကို 
အမေနဲ့ဝေးလို့ အဝေးကိုရောက်မှ ပိုသိခဲ့ရတယ်

နွေးထွေးလှတဲ့ အမေ့ရင်ငွေ့ကို 
အမေနဲ့ဝေးမှ ပိုပြီးတမ်းတခဲ့မိတယ်

ကြင်နာလှတဲ့ အမေ့ရဲ့ အထွေးအပွေ့တွေကို 
အမေနဲ့ဝေးမှ ပိုပြီးလွမ်းဆွတ်လာမိတယ်

ဘာပဲဖြစ်ဖြစ် အမေ့အပေါ်မှာ တာဝန်မကျေခဲ့တဲ့ 
အမေ့ရဲ့သားမိုက်တစ်ယောက်ကို 
ခွင့်လွှတ်ပါ အမေ

အမေ့ရဲ့ အနှစ် (၃၀) ပြည့် မွေးနေ့မှာတောင် 
အမေ့ရင်ခွင်အရောက် မလာရောက်နိုင်ခဲ့တဲ့

အမေ့ကိုချစ်တဲ့ သား

အရှင်ဝိမလ (ပေါက်ခေါင်း)