မုတ်သုန်လေရူး၊သွင်သွင်မြူးသည့်
နွေဦးကာလ၊ သမယတွင်
ရွာအဝင်မှ၊ ဖုန်ထသောလမ်း
အသွင်ဆန်းကို၊ တမ်းတမိသည်
မွေးဌာနီ။
ရွာ၏အလယ်၊ လွန်တင့်တယ်၍
ဝင့်ထည်လှစွာ၊ ကျောင်းဝိဟာနှင့်
မကွာအမြဲ၊ တူယှဉ်တွဲသည့်
လက်တွဲအဖော်၊ ပင်ကံ့ကော်သည်
ဖူးမြော်သည့်လား၊ စေတီဘုရားကို
ညွတ်တွားနေသည်၊
မွေးမြေဆီ။
ရွာ၏နောက်ဘက်၊ တောင်ကုန်းထက်ရှိ
ခက်လက်စုံလင်၊ လက်ပံပင်မှ
မြည်သံဟစ်ကြွေး၊ ကျေးငှက်တေးကို
နွေးထွေးသာယာ၊ တေးသံသာသွင်
စိတ်မှာထင်၍၊ မြင်ယောင်မိပေ
မွေးရပ်မြေ။
မွေးရပ်မြေမှ၊ မိတ်ဆွေပေါင်းသင်း
သူငယ်ချင်းနှင့်၊ ရောင်းရင်းများစွာ
မျိုးသဟာကို၊ ရင်မှာပေါက်ဖွား
လွမ်းစိတ်များဖြင့်၊ မခြားနေ့ည
သတိရ၍၊
တမ်းတလို့သာ၊ မျှော်မိသည်။
မှန်းဆလို့သာ၊ ခေါ်မိသည်။
ကိုပေါက်ခေါင်း
No comments:
Post a Comment