မြန်မာအိုင်ဒေါနှင့် အကျိုးရလာဒ်

ယခုတလော မြန်မာလူမျိုးတွေရဲ့ ပါးစပ်ဖျားမှာ ရေပန်းအစားဆုံး ဝေါဟာရတစ်ခုကို ပြပါဆိုလျှင် Myanmar Idol ဆိုသော အရာကြီးကို လက်ညှိုးထိုးပြရပေလိမ့်မယ်။

တခြားသူတွေ ဘယ်လောက်ပင် စိတ်ဝင်စားနေပါစေ ကျွန်ုပ်ကတော့ ထိုမြန်မာအိုင်ဒေါဆိုသော အရာကြီးကို နည်းနည်းလေးမှ စိတ်ဝင်မဝင်စားခဲ့ပါဘူး။

သို့သော် ပြီးခဲ့တဲ့ ကြာသပတေးနေ့ညမှာ အပျင်းပြေ ဖေ့ဘုတ်ကြည့်နေရင်း တစ်ချိန်တုန်းက နာမည်ကြော်ကြား လူကြိုက်များခဲ့တဲ့ အဆိုတော် ကိုဝင်းဦး ဆိုထားတဲ့ မမမိုးသီချင်းကို အားရပါးရ ပိုင်ပိုင်နိုင်နိုင်ဆိုနေတဲ့ ဝတုတ်တုတ်နဲ့ လူတစ်ယောက်ကို တွေ့လိုက်တယ်။

သူဆိုတာကို သဘောကျလို့ ဘယ်အတွက်ကြောင့် ဘယ်မှာဆိုနေတာလဲဆိုတာကို မွှေကြည့်လိုက်တော့ မြန်မာအိုင်ဒေါ ပြိုင်ပွဲမှာ ဝင်ရောက်ယှဉ်ပြိုင်နေတဲ့ ဝါသနာရှင် လူငယ်တစ်ယောက် ဖြစ်နေတာကို သိလိုက်ရတယ်။

သားငယ်ဆိုထားတဲ့ မမမိုးသီချင်းကိုကြည့်ပြီး မြန်မာအိုင်ဒေါကို ကျွန်ုပ်စပြီး စိတ်ဝင်းစားခဲ့တယ်။ သူနဲ့အတူ ပါဝင်ယှဉ်ပြိုင်ခဲ့တဲ့ ပြိုင်ပွဲဝင်တွေကိုလည်း နည်းနည်းဝင်လေ့လာခဲ့တယ်။ နောက် သောကြာနေ့မှာ တင်ဆက်တဲ့ မြန်မာအိုင်ဒေါရဲ့ Result Show ကို ဆက်ကြည့်ဖြစ်တယ်။

အဲဒီပွဲမှာ မောင်တို့ချယ်ရီမြေသီချင်းကို ကျကျနနဆိုနိုင်ခဲ့တဲ့ ဇင်ကြီးတစ်ယောက် ပြိုင်ပွဲက ထွက်လိုက်ရတယ်။

ဇင်ကြီးက ဘာဖြစ်လို့ ပြိုင်ပွဲက ထွက်ခဲ့ရတာလဲ။ အဆိုမကောင်းလို့လား။ အသံမကောင်းလို့လား။ အမူအယာ မလုပ်တတ်လို့လား။ အဲဒါတွေ တစ်ခုမှ မဟုတ်ပါဘူး။ ဇင်ကြီး ပြိုင်ပွဲက ထွက်ရတာဟာ သူ့အတွက် ပရိသတ်ကပေးတဲ့မဲ အနည်းဆုံး ရလို့ပါတဲ့။

အဲဒီမှာထပ်ပြီး စိတ်ဝင်စားမိတာက ပရိသတ်က ဘယ်လိုမျိုး မဲပေးကြတာလဲဆိုတဲ့ မဲပေးပုံ နည်းစနစ်ပါပဲ။

မဲပေးနည်းစနစ်ကတော့ MPT ကဒ်ထည့်ထားတဲ့ ဖုန်းနဲ့ ကိုယ်ကြိုက်တဲ့ ပြိုင်ပွဲဝင်ရဲ့ နံပါတ်ကို မက်ဆေ့ပို့ပေးရတာပါပဲ။ မက်ဆေ့ပို့တဲ့နေရာမှာ အကြိမ်ရေ ကန့်သတ်ထားခြင်း မရှိပါဘူး။ ကိုယ်ကြိုက်သလောက် ပို့လို့ရပါတယ်။ ဖုန်းတစ်လုံးတည်းနဲ့ ကိုယ့်မှာပိုက်ဆံရှိရင် ရှိသလောက် မဲပေးလို့ရပါတယ်။ အကြိမ်ရေ သန်းချီပြီး ပေးလို့လည်း ဖြစ်ပါတယ်။

နောက်မဲပေးနည်းတစ်ခုကတော့ ဖေ့ဘုတ်ကနေ ပေးခြင်းပါပဲ။ ဖေ့ဘုတ်က မဲပေးမယ်ဆိုရင်တော့ ကန့်သတ်ချက်ရှိပါတယ်။ အကောင့်တစ်ခုကို မဲတစ်ခုပဲ ပေးခွင့်ရှိပါတယ်။

ဖုန်းနဲ့ မက်ဆေ့ပို့ပြီး မဲပေးတာကျ ကြိုက်သလောက် ပေးလို့ရပြီး ဖေ့ဘုတ်ကနေ မဲပေးတာကျတော့ အကောင့်တစ်ခုကို တစ်ခါပဲ ပေးခွင့်ရှိရတာလဲ။ ဘာပြုလို့ ကိုယ်ကြိုက်သလောက် ပေးခွင့်မရှိရတာလဲ။ စဉ်းစားစရာပါပဲ။

အမေရိကန် အိုင်ဒေါမှာတော့ လူတစ်ယောက်ကို မဲအရေအတွက် ဆယ်မဲပဲ ပေးခွင့်ရှိတယ်။ မြန်မာအိုင်ဒေါမှာတော့ မဲအရေအတွက် အကန့်အသတ် မရှိဘူး။ အဲဒီကွာခြားခြင်းရဲ့ အကျိုးရလာဒ်က ဘာတွေ ဖြစ်လာမလဲ။

မြန်မာအိုင်ဒေါရဲ့ ဒိုင်လူကြီး ဦးသိန်းတန်ကတော့ ပြောပါတယ်။ နိုင်ငံကြီးသားပီပီ တကယ်အရည်အချင်းရှိတဲ့လူကို မဲပေးကြပါတဲ့။ သူပြောတဲ့အတိုင်း လိုက်နာကြပါရဲ့လား။ အနည်းစုအနေနဲ့ လိုက်နာကောင်း လိုက်နာကြလိမ့်မယ်။ ဒါပေမယ့် အများစုကတော့ လိုက်နာကြလိမ့်မည် မထင်။

မဲပေးတဲ့လူတွေအနေနဲ့ "မျက်နှာကြီးရာ ဟင်းဖတ်ပါ" ဆိုတဲ့ စကားပုံအတိုင်း မျက်နှာကြီးတဲ့လူကို မဲများများ ဝိုင်းပေးကြမှာပါပဲ။ မျက်နှာကြီးတဲ့လူတွေ မဲများများ ရမယ်။ ချမ်းသာကြွယ်ဝတဲ့လူတွေ မဲများများ ရနိုင်ပါတယ်။

"ခွေးချင်းကိုက်တောင်မှ ကိုယ့်ခွေးကို နိုင်စေချင်တယ်" ဆိုတဲ့ ဆိုရိုးစကားအတိုင်း ကိုယ့်အမျိုးကိုပဲ မဲပေးကြမှာပါပဲ။ ကိုယ့်ရွာသား၊ ကိုယ့်မြို့သား၊ ကိုယ့်နယ်သားကိုပဲ မဲပေးကြမှာပါပဲ။ ဆွေမျိုးအသိုင်းအဝိုင်း တောင့်တင်းတဲ့လူတွေ မဲများများ ရနိုင်ပါတယ်။ နယ်ပယ်ကျယ်ဝန်းတဲ့လူတွေ မဲများများ ရနိုင်ပါတယ်။

ဘယ်လောက်ပဲ အရည်အချင်းရှိရှိ၊ ဘယ်လောက်ပဲ အသံကောင်းကောင်း၊ ဘယ်လောက်ပဲ အဆိုကောင်းကောင်း မျက်နှာမကြီးရင် ငွေမရှိရင် အသိုင်းအဝိုင်း မတောင့်တင်းရင် မြန်မာအိုင်ဒေါမှာ ဆုရလိမ့်မည် မဟုတ်ပါ။

မြန်မာအိုင်ဒေါ ဆိုတာ ဘာပြိုင်ပွဲလဲ။ ဘာအတွက် ယှဉ်ပြိုင်နေကြတာလဲ။ ဘာကို လိုချင်လို့လဲ။ ပြိုင်ပွဲရဲ့ ရည်ရွယ်ချက်က ဘာလဲ။

သူတို့တွေက ပြောကြတယ်။ မြန်မာပြည်အတွက် စွယ်စုံထူးချွန်တဲ့ အဆိုပညာရှင်တွေ ပေါ်ထွက်စေဖို့ပါတဲ့။ သူတို့ပြောတဲ့ ရည်ရွယ်ချက်နဲ့ သူတို့လုပ်နေတာ ကိုက်ညီမှု ရှိပါရဲ့လား။

MPT ကို မက်ဆေ့တစ်စောင်ပို့ရင် ဘယ်လောက်ကုန်ကျပါသလဲ။ အဲဒီကုန်ကျတဲ့ ပိုက်ဆံကို ဘယ်သူတွေ ရနေသလဲ။

မက်ဆေ့များများပို့ရင် ကိုယ်အားပေးတဲ့လူ နိုင်တာတော့ ဟုတ်တယ်။ ဒါပေမယ့် ပိုက်ဆံတော့ များများကုန်မယ်။ အဲဒီကုန်သွားတဲ့ ပိုက်ဆံတွေကို ဘယ်သူတွေ ယူနေကြပါသလဲ။

သေသေချာချာ စဉ်းစားကြည့်လိုက်တော့ ဒီပြိုင်ပွဲကြီးက တို့ပြည်သူတွေဆီက ပိုက်ဆံတွေကို ချူစားနေတဲ့ ပွဲကြီးပါပဲ။

အဝေးကနေ ကြည့်လိုက်ရင် ဟုတ်သလိုလို ထင်ရတယ်။ ဒါပေမယ့် အပြင်ပန်းကသာ လှပေမယ့် အတွင်းမှာ ပုပ်နေတဲ့ ကျီးအာသီးကြီးလို ဖြစ်နေတယ်။

အဲဒါတွေဟာ မဲပေးတဲ့ လူတွေရဲ့ အပြစ်မဟုတ်သလို ပြိုင်ပွဲဝင်သူတွေရဲ့ အပြစ်လည်း မဟုတ်ပါဘူး။ အကဲဖြတ်တဲ့ ဒိုင်လူကြီးတွေရဲ့ အပြစ်လည်း မဟုတ်ပါဘူး။

အဓိက မှားနေတာကတော့ လူတစ်စုအတွက် ငွေရဖို့သက်သက်ပဲ ဖန်တီးထားတဲ့ ဒီပြိုင်ပွဲကြီးရဲ့ မဲပေးပုံ နည်းစနစ်ကြီးပါပဲ။

အဲဒီနည်းစနစ်ကြီးကို မပြင်သရွေ့တော့ ဒီပြိုင်ပွဲကြီးကနေ ဘာပညာရှင်မှ ပေါ်ထွက်လာမှာ မဟုတ်သလို အနိုင်ဆု ရသွားတဲ့လူတွေကိုလည်း ဘယ်သူကမှ အသိအမှတ်ပြုမှာ မဟုတ်ပါဘူး။

နောက်ဆုံးအနေနဲ့ မလွဲမသွေ ရရှိလာမယ့် အကျိုးရလာဒ်တစ်ခုကတော့ တို့ပြည်သူတွေ ဆင်းရဲသထက် ဆင်းရဲ မွဲသထက် မွဲပြီး လူတစ်စုကတော့ ချမ်းသာသထက် ချမ်းသာလာကြဦးမှာပါပဲဆိုတာကို မြင်ယောင်နေမိပါကြောင်း . . .

သီချင်းကိုအဆိုပြိုင်

အိုင်ဒေါလို့ဆိုပဲ။

ငွေချူကာပြည်သူအများကို

ရိုက်စားတဲ့ပွဲ။

ကိုပေါက်ခေါင်း